郵輪之旅-延續羅馬 (第二天)下

11-6-2013 星期一

聖彼得大教堂及廣場

離開了梵蒂岡博物館, 立即便到相連的 聖彼得大教堂和廣場參觀。 彼得 “Pietro” 這個中文翻譯, 是基督教聖經專用的; 至於天主教, 他們的中文聖經郤稱這位第一代的教宗為  伯多錄, 兩者同為一人。 這個教堂, 連同它的廣場, 被人稱為是全球最大, 最美, 最華麗, 最巧究, 最堅固, 最最最…… 最什麼什麼 的教堂!

究竟有幾大?

廣場是圓形的, 有人說可容納30萬來朝聖的人, 也有人說可容納50萬。 這兩個數字的落差, 比香港七一遊行的不同人數統計, 算是好準確了!? 廣場的圓周, 圍滿石柱, 準確一點說; 應該叫做石柱及走廊, 因為石柱內是人行通道。 而每一根石柱頂, 都有一尊巨大的聖人石像, 據說, 總共好像140尊, 連同教堂頂的石像, 便超過140尊了。

大到可將人變小

試想像一吓, 如果一個人站在廣場上, 所有在柱頂和屋頂, 高高在上的聖人, 都在監視著你, 相信就算係教皇, 都分分鐘會腳軟; 廣場的建築設計, 成功將人的渺小, 曝露無遺, 達到宗教震攝能量的最高指數。

相反, 若教皇不站在廣場, 而站在大殿正門的石階上, 或再高一點, 站在大教堂高層的窗前, 遙望群眾, 或舉手祝福, 或廣播傳道… 大殿與廣場的關係, 立即便會變成 上天與凡人般的分殊, 施與和感恩的局面。

若把廣場挪走, 沒有石柱和聖像, 單從街道上望向聖彼得大教堂, 這所建築物, 會立即變得平淡, 或太過平民化, 喪失了它展現權能的威力! 換句話說, 聖彼得大教堂和廣場的設計, 明顯係 「心思慎密」 的成功之作!   

點解有碌從埃及來的方尖碑?

唯一唔明白嘅地方, 點解佢要在圓形廣場的中心, 棟上一枝方尖碑呢? 咁樣一 「棟」, 由大教堂的正門, 穿越廣場, 延展至羅馬段的長長中軸線, 便被遮檔住了; 就好似一枝頂心杉, 將充滿神權的教堂和等候祝福的天主教子民, 由頭到腳分隔兩端?

再講, 方尖碑的由來, 始於埃及人敬拜太陽神的異教風俗和宗教, 雖然全球各地, 都因為要追求這種建築的高聳氣勢, 紛紛將大大小小的方尖碑, 放置於不同的廣場, 作為重要地點的地標, 但對天主教來說, 意義又何在呢?

從大殿前門, 望向幾十萬人咁大嘅廣場, 這枝棟在廣場最中心點的高高的尖頂柱, 應該比弧形石廊頂的聖人石像們還要高, 仿如另外一個立體的權力像徵, 將原來由大殿輻射出來的絶對權能, 突然分拆; 若50萬的朝聖者都集合在廣場的話, 那站在方尖碑後的群眾難免會唔夠聚焦, 唔知望教宗好? 定望吓枝石碑好? 總之, 呢碌石柱, 好唔順眼!?

高唔一定係好?

根據舊約聖經的解釋, 人類之所以有咁多種語言, 係因為曾經有班友仔, 心高氣傲, 建造了一個以為可以高到爬上天庭的 巴別塔, 仿忽意味著毋須再倚靠上帝,  結果, 上帝便將人類的口音變亂, 作為懲罰。 如今的方尖碑, 雖然不是高塔, 又有一個小小的十字架在尖頂處, 但點講都唔能夠話佢係代表上帝的權力, 咁如果這碌像徵權力, 又有啲似巴別塔嘅尖柱, 唔係代表上帝, 但係又放喺上帝嘅地頭, 咁佢又係代表乜呢? 圓形的廣場, 中心插上一支高柱, 唔通係用嚟做天文時計? 喂, 唔好玩喇! 實情如何? 大家唸唸囉!!

最巴閉的 聖彼得大教堂

說回聖彼得大教堂本身, 真係全世界最巴閉嘅建築物, 佢比起世界上好多的皇宮更華麗。 走進大堂, 高到望唔盡嘅樓底, 本身已有一種好莊嚴嘅氣勢, 而所有的樑柱、牆、窗戶、石雕、掛畫、甚至地板等等等等… 全部都係精雕細琢, 瑰麗豪華!

色彩温暖瑰麗

就教堂而論, 此教堂內部的裝修, 也是全球教堂中, 最具顏色層次的; 棕紅色紋理的圓石柱柱廊, 分隔開大殿和兩邊的多間小殿、而大殿旁的方石柱和拱形框門, 則有粉白色的長條畫框, 及內襯棕色雲石面板, 在雲石上再鑲嵌有不同形像的小石雕、其他的聖
人石像, 雕工活靈活現, 主要顏色是泥色, 栩栩如生。 至於其他創作性的雕像, 如 聖殤 “Pieta” 則為光滑的淡灰色。柱廊的弧形天花拱頂, 有黃色燈
光, 由隱藏的燈糟反射上彩色的壁畫上; 教堂的聖壇, 頂部有穹頂窗戶, 透進著天然的白光, 把以金色
和深銅色作對比的 青銅華蓋聖龕 “Baldac Chino”, 影照得好神聖; 所有所有的物品與及各區的名家藝術品, 各盡其職, 把整個由本來冰冷石材打造的殿堂, 散佈著温情。

建築精緻立體

論建築佈局, 聖彼得殿堂是 廳中有廳, 房中有房的。粗大的柱廊, 本身已被建構成不同的獨立區域, 走廊的左右, 又各有獨立的小廰堂; 參觀的人, 基本評語一定是 「好大!」 其實真係形容得好精準, 有人話可以容納6萬人, 真係好
大! 若再細意參觀, 跟著的評語可能會係「大得嚟好美」, 若參觀時間再長一點, 腿又倦, 要停步休息, 然後四周環顧, 評語可能會升級為「美得嚟又好豪, 又不落俗套」!

論藝術風格, 堂內的所有藝術品, 包括, 一幅由馬賽克鑲嵌, 有 聖彼得 手持著
教會鑰匙的畫、由 米高安哲奴 雕刻, 又是唯一雕上他自己
名字的驚世石雕 聖殤 “Pieta”、到處高低橫樑的細緻石造花邊 與及 每一條柱頂連接著的各圓拱框的石雕花托 等等等等, 都令人覺得

全院精湛, 匠心獨運, 總之係好靚, 好好睇!

論宗教氣氛, 教堂內聖物處處, 更有好多聖人棺塚, 亦有最重要的, 就是教堂的主角, 被稱為 教會磐石的 聖徒彼得, 是長埋在教堂地底深處的!  無論係唔係天主徒, 身處呢個環境, 都自然會肅然起敬, 對上帝心生敬意!

靚成咁! 真係無嘢講囉。若有微言, 可能就係
覺得佢 「靚得太過份了!」或者, 心裏會說「使唔使靚到咁誇張呀!」諸如此類啦… 也可能有人會有另一個特別的意見, 就係在呢個, 已被聖物聖飾, 都全面覆蓋之下的三維空間內, 是無人可以找到一幅空牆的, 唔知咁又算唔算係缺點呢?!!

有錢到唔知點算好?

唉! 參觀完這所大殿, 真係覺得天主教好有錢。有人話, 教廷是世界上最大的慈善機構, 又有錢, 又做善事, 真係有啲唔明白, 點解世界上重有咁多人, 要在危病的死亡邊緣捱苦, 甚至等死呢? 係因為教會唔知? 唔理? 幫極都唔到? 政治理由? 真係好想問吓香港嗰位 陳主教, 識唔識答呢個問題。佢收咗肥佬啲錢之後, 除咗同佢坐商務機位去梵蒂岡揾教宗傾偈之外, 做過啲乜呢?

世界各地有好多教堂, 無論有多靚? 有多豪? 都應該「夠皮了吧」! 毋須要, 亦不可能要再豪再靚了! 教廷本身財富巨大, 有自己的銀行, 有最Top 嘅投資顧問幫佢賺錢, 重有信徒的恆常奉献, hold 住咁多錢, 做乜好呢??
 
聖天使堡有條走佬通道

離開了教堂, 便往聖天使堡走, 聖天使堡的圓形建築, 於中世紀時, 曾是監獄, 也曾作教皇官邸, 現在則是一所博物館。 由於過了入場時間, 雙腿亦已無力再走, 便不入內參觀了, 只在外圍走走。 這個建築, 有點像中國的土樓, 無甚特式。不過, 由聖彼得大教堂往聖天使堡一路走來時, 發覺左邊有一幅與走道平衡, 又矮又長的城牆; 邊走邊看, 原來這小城牆的牆頂是一條直通聖天使堡的通道。翻查資料, 於1084年, 教宗貴格利七世為了逃避德皇亨利四世的追殺, 曾利用此通道逃走, 到了1527年, 教宗革利免七世, 為了躲避 羅馬浩劫 時, 也在這逃亡, 這條走佬通道, 對兩位教皇, 真係意義重大!

 
聖天使堡外面是一條河, 河上有一條出名的聖天使橋 “Ponte Santa Angelo”, 是接連城堡和 聖彼得聖殿的 主要通道。橋上有好多天使石像, 都幾靚, 不過, 最吸引人的反而是, 那些街頭的表演者, 有人夾 band、

有人演奏樂器、 也有觀眾即興加入一起表演, 黃昏時的聖天使橋, 好不熱鬧!  

好在有藍河

不可能再行了, 好肚餓。但怎樣回去呢? 行路又遠, 又唔識找的士。唯有行多一小段, 反回地鐵站坐車吧! 終於回到 Via Carlo Alberto了, 羅馬的第二天, 行到腳跛! 立即去藍河餐廳醫肚, 有湯有茶, 有菜有肉, 覺得乜都好好食, 休息一會, 回魂了! , 旅行呢家嘢真係好難解釋, 行到死死吓, 但郤覺得好開心, 無得救…    


(各位大哥大姐, 睇完請 click 下面嘅 "沒有留言" , 俾啲意見好喎! )