郵輪之旅-延續羅馬 (最後一天)

15-6-2013 星期六

Hotel Europa 也有好嘢?

6月15號, 星期六, 一覺醒來, 先去地庫餐廳食早餐, 對義大利的早餐其實已經死心, 但多少都好, 總係要食嘢啩! 出乎意料, 餐廰有好多嘢食, 果汁任飲, 也可點叫免費奶茶咖啡, 自助食物方面, 有多款麵包、 腸仔、火腿、雞蛋、 應有盡有, 邊個話呢間唔係三星級酒店呢? 有眼你睇, 真係好多嘢食。 仲有一個奇景, 就係除了包了早餐的房客之外, 也有其他付費用餐的客人, 在義大利住了總共六晚, 即合共試了六次酒店早餐, 這一次, 才真正感覺到似一份早餐, 活該!

真係比班義大利佬玩死, 三星級的酒店房重衰過B&b、 花灑龍頭未用已爛、 前枱職員淨係識睇鹹相, 唔識用電腦印嘢!? 但早餐反而咁多嘢食, 吹脹!?   

旅遊巴士毫無秩序, 重要嗎?

執好包袱, 去坐旅遊巴了。 巴士站好多人, 全無秩序, 雖然有工作人員, 但處事毫無方法, 等車的人, 全部都好不滿。 但話得說回來, 4歐的網上價, 比起Express火車票價14歐, 每人足足平了10歐, 即超過100港元, 就算嗰位職員管理得再差啲, 都係無乜所謂囉。 再講, 在車站排隊買票, 都貴網上價1歐, 那今次因不願排隊, 改為網上購買, 絶對係平靚正喇, 其他小問題, 頓時已忘記晒囉!

個多小時便到機場了, 十四天的行程全部完畢, 好滿足!     

(各位大哥大姐, 睇完請 click 下面嘅 "沒有留言" , 俾啲意見好喎!) 

郵輪之旅-延續佛羅倫斯及羅馬 (第三天)

14-6-2013 星期五

永不錄用

早上起來, 吃過超迷你早餐後, 便準備退房。這家Relais II Campanile al Duomo B&B 地點很好, 工作人員的待客態度也很友善, 但論到房間設施和服務, 則好唔掂, 住了只兩晚, 夠了!

在所有的問題中, 最攞命的, 便是淋浴間, 無論如何把浴屏門關緊, 都會有大量的水漏出去廁所地面, 每次沖完涼, 整個廁所都是水汪汪的, 更可愛的!!? 就是地台沒有去水口, 滿地的水, 就只能自然風乾, 真係無得頂。 第二, 房間真的是太細了, 在大床和廁所之間, 就是房內唯一的大衣柜, 若把柜門打開, 便會擋住廁所入口, 除了不方便之外, 亦有危險。 第三, 也是死得人的! 入住時, 房內的使用房間規則, 註明了要三天才會更換毛巾, 換句話說, 若只住兩晚的房客, 自動便會變成環保節能人士, 因為要把毛巾不斷循環再用, 問你怕未? 
    
Via Ricasoli 附近的街道

退了房, 把行李寄放在酒店, 便再到附近行街。 在Via Ricasoli附近的店舖, 除了服裝店之外, 也有畫廊和飾品店, 也看到一家中菜館, 除了小菜之外, 竟然有港式點心吃, 可惜時間不夠, 若不然, 一定會試一試。 在佛羅倫斯的這幾天, 發覺衣物和用品的價錢並不貴, 不過, 在這一條內街, 經過的遊人好多, 但真正會停下購物的人郤很少, 看來商舖經營好因難, 好多公司的服務員, 都願意主動減價。
 
Euro-star 奇遇

到羅馬的火車11點開出, 又可再次享受這高速和舒適的 Euro-star旅程。 好不巧, 坐在我們隔鄰的, 是一對中國男女, 他們主動搭訕, 便交談起來了, 兩人並不是夫婦, 只不過是因為要幫各自的家人, 專誠返回羅馬機場, 取回遺失了的行李。

對! 沒有搞錯, 他們是從佛羅倫斯先坐火車到羅馬火車站, 然後, 又再由羅馬火車站轉火車到羅馬機場, 取回寄失了的行李。 他們是美國移民, 兩個在美國定居的家庭, 相約到佛羅倫斯和義大利其他城市旅遊, 但在羅馬落機時, 部份行李失了踪, 唯有報失! 然後到入住了佛羅倫斯酒店的第二天, 才收到航空公司通知, 行李已給找到. 本來航空公司是可把行李送到他們的酒店的, 但因已沒有信心, 唯有丟下家人, 山長水遠, 親自返回羅馬機場, 把行李搬回佛羅倫斯。

Oh, my god! 咁嘅嘢都會發生, 唔怪得我地中國人話, 行船跑馬三分險了, 雖然在網上也有看過類似的分享, 但親耳聽苦主現身說法, 還是第一次, 真係好同情他們!!

羅馬一日閒閒遊

講吓講吓, 已到羅馬了, 今次book了另一家叫Hotel Europa的酒店, 位於火車站的北面, 走路過去, 比起幾天前住的Buonarotti還要近, 五分鐘便到。 這間自稱為三星級的酒店, 房間還差過一般的B&B, 大堂職員粗魯、 冷氣有雜聲、 沖涼花灑頭破爛, 真係咁都得? 算啦! 只住一晚, 也懶得去要求職員處理了。

今次安排返回羅馬先住一晚才離境, 一來是避免回程時過於怱忙, 因為回港航班的時間為明天下15:30, 若明天才由佛羅倫斯直接去機場, 始終都係要先停羅馬火車站, 然後才可再轉車去機場, 那就倒不如住一晚羅馬, 作個緩衝吧! 另一方面, 玩了這麼多天, 已經好攰, 取到酒店房以後, 可先作休息, 然後輕輕鬆鬆逛逛街, 明早便可從容退房去機場了。   

感謝天公

 

休息夠了, 便出外行街。 火車站就在酒店的街頭, 最好就是先去購買明天到機場的旅遊巴士車票吧。 嘩! 好多人排隊, 怎麼搞? 不等了! 反正火車站這麼近, 隨時都可以再出來買票, 而且, 去機場的方式, 除了旅遊巴士之外, 也可以坐貴一點, 但更快的Express火車, 不過, 第一天到羅馬時, 已坐過Express了, 若可試一吓旅遊巴士, 就最好不過囉。

漫無目的地, 走在羅馬的街道上, 再一次享受著今次出門這麼多天的恩賜; 六月份的歐洲天氣, 清爽怡人, 由第一個旅遊城市卡塔爾的多哈開始、 然後跟著郵輪隨海漂遊、 到過義大利的山城Taormina、 到過希臘的雅典和Chania、 也參觀過美麗的士耳其城市Kusadasi, 這麼多天來, 除了中東的多哈稍熱之外, 歐洲的其他方, 全都是風和日麗, 天色蔚藍, 由攝氏十多度到最熱的二十度左右, 不會涷, 也不會熱, 而且濕度不高, 感覺總是輕爽自然… 點解十四日以來, 都未曾遇過雨天呢? 科學答案就沒有了, 唔通真係神愛西人? 總之就係覺得好幸運,  天公正在造美。

羅馬的中國手錶

行吓行吓, 發覺在這一區也有一兩家中菜廳, 其中一間叫復興餐廳, 從窗口望進去, 發覺裝修好雅緻, 待一會, 定要來試試。

在這家餐廳附近, 有一間小型百貨商店, 有手飾、 鐘錶、 金筆、 書本、 文具、 成衣及皮鞋等等, 什麼都有得賣。 在一個專賣手錶的窗櫥內, 看到一個奇怪的現像, 就是在一堆手錶之中, 價錢分別極大, 由幾百歐至幾歐都有, 不過全部都不是名牌, 便向店主查詢, 為什麼差價會這麼大, 他的答案好簡單, 「貴的全是意大利貨, 而最平的那一批, 則全是中國製造」。 唔係啩? 究竟一枚零售價10歐的手錶, 除了工資、 運輸、 廠房等生產成本之外, 中國的製造商實質可以收到多少錢呢? 收到錢之後, 又賺到多少呢? 人家所生產的, 外觀看來差不了多遠, 但零售價卻要200歐或以上, 那在這個年頭, 為什麼西方人還時常批評中國搶走他們的飯碗呢? 事情根本好簡單, 只要西洋人把工資大幅下調至中國工人的幅度, 生產成本便會下降, 零售價不是也可同步下降嗎? 到時, 誰都會爭住去買10歐的意大利手錶啦! 但西方人願意減人工嗎? 中國以廉價勞工去滿足世界市場, 減輕了西洋人的生活支出, 卻還要遭人垢病, 這公平嗎? 不用說了, 「老細! 10歐的中國手錶, 就立即給我來一個…」

復興中菜唔多掂

回到了剛才的復興中菜館, 有兩枱客人, 一位老外小姐, 另一枱是一個印度家庭。 見到他們也在用餐, 頓時放心了, 相信這裏的食物一定不錯吧! 點了幾個菜, 唉, 我錯了!?  不好味。 是在羅馬試過三家中菜館之中, 最弱的一家, 雖然也是最平的一家! 但平有屁用咩? 食物不濟, 就算是裝修再靚, 都唔會有回頭客啦, 難怪那位毫無笑容的老板跟我說, 他也到過香港多次, 更大讚香港的食肆如何好味, 如何了得。 當然啦! 跟他這一家去比, 難怪他有這麼實在的結論, 唉, 到霉!       

三星級? 三級?

返回酒店了, 靈機一觸, 上網看看可否在網上購賣到機場的旅遊巴士車票? 皇天不負有心人, 真係有, 而且重平好多. 網上價是4歐, 在火車站排隊購買, 反而要5歐, 這是什麼道理呢? 不管了, 先完成了網上買賣吧。 完成了, 但面對同一個問題,  就是要把網上票打印出來, 怎辦呢? 方法只有一個, 就是先儲入USB 手指, 然後,拿到前枱, 請職員幫忙打印。 職員又高又大, 好有型, 他按了電腦好多次, 真係好本事, 竟然搞到一穫泡, 一時搞到我的檔案失了踪, 一時開得到檔案, 但又印不出來。 更好笑的, 還給我發現在電腦內, 有一大批裸照? 他不住解釋說, 不知為什麼會有這批鹹相, 真的不是他做的諸如此類, 我唯有安慰他說 “no big deal”, 唉! 只要他能幫到我印出網上票, 就算硬要話啲鹹相係我放入去嘅, 都無所謂啦, 但他試來試去都失敗... 幸好, 當時有一名行李生經過, 應該是印度人吧? 他見到那位高大威職員滿頭大汗, 便主動幫忙, 大槪三十秒, 我便拿到車票了, 唉, 究竟呢一間係三星級酒店, 還是「三級」酒店呢?