極致號Solstice 2013 紐澳第三天

12月11日 星期三
Bay of Islands

埋岸新體驗!

Solstice 今早到咗第一個港口 Bay of Islands, 可以上岸玩喇! 由於呢度嘅碼頭不夠深水, 我地隻船只可停泊喺海中心, 要上岸, 就要轉乘接駁快艇–Tender Boat 去碼頭囉。 

雖然多艘快艇已不斷往返, 但由於船客共有 2千幾人, 船公司要求大家先到 4樓 Cellar Masters 酒吧取籌, 然後再要等半個鐘, 先至有得分批坐艇埋岸。


當然啦, 如果參加船公司嘅 Excursion, 就梗係唔使攞籌, 到時到候, 仲會有專人帶你坐艇埋岸, 繼而開始岸上遊。

點會參加船公司嘅 Excursions 呢?

船公司今日嘅 Excrusions 共有 12項, 收費由 179美元【1396港元】, 到 46美元【359港元】, 參唔參加? 悉隨專便。 由出發之前直到尋日, 左諗右諗, 都係覺得制唔過, 因為大部份嘅價錢都要成千銀或以上, 而好多景點, 都係可以自己去得到, 花費亦很低。 就以最平嘅呢個只有兩個鐘嘅 Excursion 為例, 首先去參觀嘅係 Christ Church, 據聞係「紐西蘭」最舊嘅一間小教堂,

跟住就係去一間叫做 Pompallier Mission 嘅法式小屋, 嗰間屋係當年嘅法國傳教士, Bishop Pompallier  用嚟印刷第一本毛利文聖經嘅地方。 咁如果自己去又點呢? 答案好簡單, 都係行路過去, 分別就係佢會有一個導遊沿途講解, 359港元其實係導遊同埋入場費, 俾錢聽佢講書無所謂, 但乜嘢都要集體行動就有啲唔自由, 一齊出發、 一齊行、 一齊聽、 一齊睇、 最慘就係要一齊走, 想留耐啲都唔得? 都係咪搞, 自己行過去起碼唔使限時限刻, 仲可以慳番啲錢!  

要坐救生艇? 

終於上咗艇囉! 用嚟接駁嘅快艇, 其實係吊喺郵輪兩邊嘅較大型救生艇, 用到佢嘅時候, 水手便會用綱纜將多艘快艇放落海面, 每艇可載一百人左右, 速度好快。


如果鍾意影相, 又唔怕大風, 可以坐上船頂, 不過就要諗清楚, 因為要坐成十幾分鐘先埋到岸, 有時仲會有浪花打上身添架!

Bay of Islands 有三個碼頭可以登岸, 分別係Waitangi、 Paihia 及 Russell。 不過 Solstice 嘅快艇只會來回 Waitangi ,





若要去 Paihia 嘅話, 都無問題, 因為當地旅遊單位, 會為 Solstice 嘅船客提供免費 Shuttle Bus, 任搭唔嬲, 而到咗 Paihia 就可以搭船過對面海嘅 Russell 玩, 不過搭船就無得免費咁筍喇!

Waitangi 好重要!

船公司選擇喺 Waitangi 碼頭俾船客上岸, 可能係因為嗰度有一個著名景點 Treaty Ground。 呢個景點其實係俾啲遊客認識原住民「毛利族」–Maori 嘅文化同埋歷史嘅。 裏面有展館、 表演場、 餐廳等等.., 而最重要嘅就係, 喺嗰度亦係Treaty House 嘅所在地! 顧名思義,  Treaty House 就係 「毛利人」同英國政府簽訂 Treaty 嘅地方, 喺嗰度一簽, 從 1840年 2月 6日開始, Treaty of Waitangi 就正式生效, 成個「紐西蘭」就做咗英國嘅殖民地喇, 亦即係話, 「毛利人」嘅祖地, 就係咁就交咗俾「英國人」囉, 幾咁簡單!?

觀鳥

水手向駕駛倉嗰位大哥表示上齊人, 咁架大飛就飛咁快去咗 Waitangi 碼頭喇, 大部份嘅船客都會搭免費巴士去 Treaty Ground 或者 Paihia 遊覽, 不過由於網上嘅資料話, Waitangi 碼頭附近係一個觀鳥熱點, 可看到「紐西蘭」嘅不同雀鳥, 所以早已準備好望遠鏡和相機喺呢到觀鳥。

碼頭附近有一家酒店, 酒店背後係一遍臨海嘅大草地, 走在草地上, 已睇到一家大小嘅 Quails 在活動,




再往海邊走, 石灘上, 有一隻白領翡翠  Collared Kingfisher 正在悠閒地日光浴,

望遠少少, 又見到在「紐西蘭」稱為 Shag 嘅鸕鷀,





 同埋玫瑰鹦鹉 Platycercus eximius  等等...。 

對於觀鳥嘅人嚟講, 外遊係會有額外嘅樂趣噃! 好似喺 Waitangi 呢個景色咁靚嘅小鎮, 除咗可以欣賞海景山色之外,





只要擔天望地時, 稍為留意一下山頭樹梢、 海濱奇石、 甚至沿路嘅門庭花草, 隨時都可能會睇到啲可愛嘅雀鳥飛上飛落, 又或者係唱歌求偶, 真係好得意架! 

今日天氣好熱, 周圍咁行去睇雀, 睇到又熱又攰, 見到附近有一個叫做 Bowling House 嘅地方, 即係香港人玩嘅草地滾球, 有一片好大嘅草地, 唔理咁多囉, 見到球場四邊都有長椅, 一於坐喺度唞吓氣先咯!

其實 Waitangi 呢個地方, 位處海邊, 海景好靚, 仲隨時都睇到泊喺海中心嘅 Solstice 添,






而碼頭附近, 每一忽都係花草樹木, 環境都好怡人!





望遠少少, 見到有一家人喺草地上野餐, 諗起上嚟, 香港已經無人喺公園度野餐囉, 係因為天氣太熱? 抑或係去餐廳價錢太平? 可能兩樣都係啩! 喺佢地嘅身邊, 有一隻海鷗, 越企越埋, 仲一路都唔肯走, 似乎係等人俾嘢佢食, 佢好似已經唔記得咗自己係一隻野鳥, 而當自己係一隻竉物, 望落去又幾温馨!  

路過 Treaty Ground

坐夠喇, 一場嚟到, 梗係要去昅吓嗰個出名嘅 Treaty Ground 啦! 一分鐘都唔使, 就嚟到佢嘅正門。 門口有兩位 Maori 人揸住碌棍, 喺到玩緊花式, 相信呢種係佢地嘅傳統技藝啩? 睇咗一陣, 就見到有另外一批船友坐 Shuttle Bus到達, 由於網上有人分享話 Solstice 係會請 Maori 族上船表演嘅, 所以就無打算入內參觀, 不如就走去 Paihia 鎮度行吓好過! 隨即就上咗 Shuttle Bus, 去 Paihia 咯。   

Paihia

巴士好快就開到去Paihia 鎮, 巴士站嘅所在地, 就係喺呢度最熱鬧嘅地帶, 亦即係 Paihia 碼頭。 碼頭本身有餐廳, 亦有幾家商舖,



而橫過斑馬線, 就係一片草地; 唔知係咪因為有郵輪埋岸, 草地上, 搭起咗有廿幾個攤檔, 望落去, 同香港嘅跳蚤市場好相似, 賣嘅嘢,  都係嗰啲囉... 手工藝品、 「紐西蘭」嘅特產之類嘅嘢, 無乜特別。


遊客都係寶

連接住呢個大笪地嘅, 就係最旺嘅商業地帶喇, 不過呢個旺點, 數埋都唔夠三十間舖頭, 如果唔係我地隻船停喺呢度, 真係唔知呢堆舖頭去邊度揾人幫襯,

行吓行吓, 仲見到有間叫做 京華酒家嘅中國餐館, 鬼佬餐廳都咁少客人, 唔知呢間唐餐又點喇!? 唔怪得人地話「紐西蘭」乜嘢都貴, 呢個國家人口少, 咪即係生意少囉, 如果貨物再要賤賣, 不如返屋企瞓覺好過! 久不久有遊客到嚟, 自然就係當寳咯!

馬路小天使

唔怪得喺呢條無乜車嘅馬路度, 竟然有兩位老人義工, 每當有車駛到斑馬線時, 佢地都會舉起停車牌截停車輛, 使遊客能優先過路。 作為習慣人車爭路嘅香港人, 睇到呢個人又少, 車又少嘅小鎮, 仲要由兩位老人家, 身水身汗咁樣喺到做「馬路小天使」, 雖然覺得有啲好笑, 但係亦被佢地嘅好客精神所感動, 諗起有啲香港人鬧遊客係蝗蟲, 又話唔淮人地嚟買嘢, 真係有啲 "O" 咀!?

從商舖走遠少少, 就係住房區, 兩三層高嘅房子整齊雅潔, 靠山臨海, 大部份都有前後園子, 且遍植花卉, 環境非常之怡人。

坐渡輪去 Russell

Paihia 地方不大, 行咗一個鐘, 差唔多喇! 咁下一個行程係乜呢? 梗係坐渡輪去 Russell 啦! 來回船費 12紐幣【76.8港元】, 以呢度嘅物價嚟講, 唔算貴喇。


好快到咗 Russell, 望到嘅環境比 Paihia 更靜, 無論民居或商舖都不多, 不過房屋嘅款式就好似幾高檔, 尤其係半山嗰度, 有幾間屋好靚, 好有現代感。


沿著海岸線走, 一邊係海, 海景山色好靚, 不過睇得多咗, 就覺得都係咁上下;




另一邊係疏落嘅民房, 亦有一家餐廳, 不過就無乜客人。





當街按摩!

靠近餐廳嘅一棵樹下, 竟然睇到有一位按摩師, 正在為一位女客人按背!? 當街當巷按摩, 就算喺大陸都好少有, 都算係一個奇景囉!




景點唔吸引?

Russell 無幾多條街, 沿海呢一條要算係最重要嘅一條囉, 因為本地最出名嘅兩間古老房屋, 就喺呢度! 話都無咁快, 就行到第一間 Pompallier Mission, 見到有其他遊客入咗裏面參觀, 咁就跟住入去睇吓啦, 入口嘅小屋, 原來只係售票處, 先要買票才能進入內院, 內院另有展館, 可參觀印刷聖經嘅工具及其他展品。 諗咗一陣, 孤寒病復發, 都係無乜興趣入去捧場, 走人可也!

至於另一個景點, Christ Church, 其實就喺附近, 不過網上睇過佢嘅資料, 來來去去都係一間古老小教堂而已, 而且庭院佈滿墳墓, 都係費事去打搞喇!

由今早出嚟到而家三點幾, 已經行咗好多路、 好攰, 都係番隻船度, 沖個靚涼, 或者上去 cheap cheap 自助餐廳, 飲吓免費下午茶實際啲囉!

晚餐幾時都咁好!

沖咗個靚涼, 喺隻船度貢吓貢吓, 又上 cheap cheap 餐廳嘆埋茶, 番房休息一陣, 咦! 又到晚餐時間喇! 每晚嘅晚餐餐牌, 都會有厨師推介, 叫得做厨師推介咁專業, 應該唔會衰得去邊啩!? 尋晚第一餐, 梗係信晒嗰幾味推介啦, 咁確實真係好嘢嚟噃! 不過回心諗吓, 又會有啲好笑, 咁唔通嗰啲無佢推介嘅嘢就唔好食咩? 無可能啫! 睇嚟, 所謂厨師推介, 都係想多啲人集中點選某兩三樣嘢, 呢啲應該係餐廳嘅行政手法, 廚房可以集中做幾樣菜, 乜嘢都會易搞好多! 一於話之佢, 按番自己嘅口味點菜好過, 結果係點? Bingo 囉..! 其他嘢嘅品質都好一流, 亦更合乎自己口味, 好彩唔聽佢支笛!  

加入老人中心?

食完晚餐, 無幾耐就夠鐘睇 Show, 今晚嘅表演者, 係三位叫 Aussie Boys 嘅澳洲哥哥, 佢地歌藝一般, 最慘就係嗰啲歌、 或者跳嘅舞, 都唔會新得過 France Sinatra 嗰個年代, 即係半個世紀之前既飛仔喎! 真係好悶! 講到個「老」字, 呢兩日喺船上, 所見到嘅船客都係老人, 如果無估計錯誤, 船客嘅平均年紀, 應該唔會細得過 65歲, 周圍嘅船友, 唔係似「謝老四」、 就似「修哥」, 老成咁! 呢兩日嘅感覺, 真係好似入住咗老人中心咁, 唔知好嬲定好笑? 唱 50年前嘅歌.., 俾呢班飛仔飛女聽, 唔係無道理吖!

極致號Solstice 2013 紐澳第二天http://skybeak.blogspot.hk/2014_01_09_archive.html

極致號Solstice 2013 紐澳第二天

12月10日 星期二
奧克蘭

到奧克蘭機場囉!

飛機喺下午一點就到咗「奧克蘭」機場, 比原定時間早咗 5分鐘, 停好晒位, 落機囉! 首先排隊過入境柜枱、 然後又要等行李, 一切都算好順利。

 

 

呢個機場嗰啲指示牌有大大隻嘅中文字, 就算唔識英文, 都唔會行錯路。 近幾年出入各地機場, 每次睇到顯示屏幕嘅中文字, 都有啲欣慰。 記得廿多年前第一次去美加, 見到當地機場嘅電子屏幕, 除咗有英文字之外、 仲有埋日文添, 真係有啲唔 alright; 再加上傳來嘅廣播訊息, 都係英日互用, 就更加條氣唔順, 點解啲鬼佬要咁樣招呼啲日本仔呢!?

事隔廿幾年, 個世界變咗囉..! 除咗好多機場有中文指示之外, 印像最深嘅, 就係中東嘅多哈機場喇, 機場裏面有間免稅店, 用大大隻中文字, 寫明歡迎使用銀聯信用咭俾錢, 睇嚟中國遊客, 已成為咗全球旅遊業嘅竉兒喇; 相反, 啲日文去晒邊呢? 真係要問吓「安倍」首相先得囉?   

攞咗行李, 睇到有幾位可能係海關人員吧?


佢地拖住隻搜查犬, 好認真咁周圍巡, 有時仲截停啲攞咗行李嘅遊客, 叫隻狗仔係咁聞, 唔知係咪收到乜嘢線報呢?

咁得意, 忍唔住靜雞雞同佢地影咗張相。

 

坐 Shuttle Bus 去碼頭好愉快!

點搭車去碼頭呢? 梗係搭最快嘅的士啦! 點知一路行去的士站嘅時候, 就睇到貼有 Celebrity 船公司標誌嘅 shuttle bus, 呢架 shuttle bus 其實只係一架 16座嘅小巴。 既然有緣相遇, 埋去問吓嗰位司機叔叔幾多錢都無妨啫? 點知價錢平到講都唔信, 兩人嘅車費, 只需 50紐元, 即 320港元, 仲平過搭的士好多!? 而有幾個喺嗰到等緊開車嘅外籍 甲、 乙、 丙、 乘客都同我地話 Good Price! Good Price!

 

司機叔叔話好快就會開車喎, 有兩位 book 咗車嘅乘客已經落咗機, 而家行緊過嚟。 既然價錢唔貴、 又唔使等好耐、 仲係船公司所委托嘅車, 無乜唔坐嘅理由噃!

話口未完, 嗰兩位乘客就到咗喇, 原來喺一對坐國泰直航機到埗嘅香港夫婦, 佢地最後上車, 跟住就即刻開車去碼頭囉。 

聽呢兩夫婦話, 喺香港買郵輪套票時, 同時訂埋船公司嘅專車。 幾多錢呢? 其實唔算貴! 每位港幣 550元, 佢地仲話出嚟玩, 最緊要都係安心啫, 無謂搞到自己要周圍揾其他車吖! 佢地嘅說話真係好啱聽, 好有道理, 仲會令人產生一種發自內心嘅敬意添! 如果唔係多得佢地肯用船公司價 550港元, 預訂好呢架車, 司機叔叔又點會肯收啲散客 160港元 咁平嘅車費呢.. ?     

 

間 cheap cheap 船房一啲都唔 cheap!

半個鐘就到咗碼頭, 排隊 check-in、 再攞埋船咭, 就可以登船, 過程非常順利。 入咗船房, 眼前一亮, 最 cheap 嘅內艙房竟然有接近 200呎, 內部設備應有盡有, 房裏面嘅儲物空間係坐過嘅三艘船之中, 最多、 又最就手嘅。  

 

衣柜足足有 6呎闊, 裏面有夾萬、 重有兩格層板, 擺放衣服及貴重物品真係一流。 除咗衣柜之外, King-sized 大床嘅床背上面, 仲有一排到頂吊柜, 床底又可以放置行李箱, 可見設計師嗰份心思。  

連接睡眠區嘅活動間, 擺咗一張好舒服, 仲可以當床瞓嘅 7呎長梳化。  

 

 

 

 

 

梳化對面牆上, 掛咗一架可以擺動角度嘅平面電視機; 電視機下面, 又係另一個儲物地柜, 柜面舖上麻石, 正好用嚟放置飲用水和水杯;
 

 

 

 地柜分左右兩倉, 左邊有五個柜桶, 而右邊則有大小門兩度。 大門內, 是一個小型雪柜, 而雪柜上面嘅另一度門, 又係一個兩層嘅儲物空格, 相信無論你帶咗幾多衣服雜物上船, 都唔會怕無地方收放。

 

至於話要閱讀書寫, 緊貼地柜嘅書枱就啱晒喇; 書枱大小適中, 又位處牆角, 就算一個人在此寫嘢, 而另一人在梳化看電視, 也互不影響! 呢個佈置得宜嘅活動區域, 將原本侷促嘅睡房, 打做得既實用、 又靈活!  

咁浴室又點呢? 絶對可以話係麻雀雖小, 五臟俱存, 佈置非常雅潔。 淋浴間大小得宜, 淋浴間對面, 就係一排靠牆嘅多功能組合柜。 組合柜包含有洗面盆、 高身玻璃儲物柜、 及相對較薄身嘅儲物間格同埋幾個柜桶, 咁嘅設計, 真係好過好多酒店。  

雖然住過 Divina 嘅露台房、 Navigator of the seas 嘅 inside 房, 比較嚟講, Solstice 呢間房嘅設計, 係最好嘅一間; 而儲物空間, 簡直就係多到離晒譜, 唉, Celebrity 搞到間房咁超值, 就原諒佢啦!
 

 

Ocean View Café 無「View」, 自助餐廳無「自助」!

玩郵輪其中一個賣點, 就係任食唔嬲。 通常嚟講, 好多船客在登船之後, 便會立即走到自助餐廳休息或進食。 原因之一, 係因為喺 check-in 時交咗行李俾船公司, 要等一小時才會有 porter 送回船房,  沒有行李, 就不能執拾衣物囉。 呢個時間, 最好就係上自助餐廳食嘢, 或者係參觀吓隻船喇。  

 

自助餐廳喺 14樓, 係全天候嘅餐廳, 亦係除咗晚餐嘅主餐廳之外, 最主要嘅免費餐廳, 由早餐、 午餐、 下午茶、  晚餐、 到夜宵都有, 一應俱全, 不過, 過了午夜則只供應簡單飲品。 

終於喺呢間叫做 Ocean View Café 嘅餐廳, 揾到一個靠窗嘅靚位, 本來以為可以一面食嘢、 一面欣賞怡人海景, 點知? 唔知係咪設計呢隻船嗰位「天才」玩嘢, 食客嘅視線, 係睇唔清海景嘅! 究竟點解會搞成咁呢...?

坐正喺窗口位又點啫? 嗰排差不多有個半人咁高嘅玻璃窗, 中間係被一條鋼樑分成上下兩個部份嘅, 而當食客坐近窗口位時, 視平線上, 睇到嘅.., 剛好就只有呢一條又粗、 又大嘅橫向鋼樑, 要望海景咩? 唔係唔得.., 一係企高, 唔好坐低、 一係就耷低個頭、 又或者盡量斜坐, 以降低視線囉!! 咁差既設計, 真係仲衰過搭巴士, 亦係第一次喺郵輪嘅自助餐廳內, 會俾嘢鋼樑 擋.. 擋.. 擋.. 擋到咁應!   

 

再環顧一下周圍嘅環境, 心情真係直插咗入水底!? 餐廳枱椅嘅款式, 毫無格調, 而用作間隔餐廳區域嘅膠片, 就更加 cheap, 有啲似醫院嘅屏風。

 

整個進食環境嘅裝修, 既似大公司嘅飯堂、 又有啲似 20年前嘅「大家樂」快餐店, 真係差到無嘢講!!


 

 

諗番起嗰位大讚呢隻船嘅資深旅遊評論員, 竟然話呢間餐廳又現代化、 又設計新穎, 真係有啲好似突然中槍倒地嘅感覺! (原文:   海景自助餐廳 (Oceanview Cafe) 海景自助餐廳也是同樣令人驚豔。一般遊輪上的自助餐廳都是將中央厨房設計在中間，食物吧台分列兩側，最外圍處則是用餐區。而在精緻極致號遊輪上卻有不同的嶄新設計，最大的突破是將厨房移至前後兩端，空出來開闊的中央區則設計成一座座獨立的食物吧台。如此的改變，可以分散人流，方便乘客選取食物，更營造出開廣、無阻礙的空間，可以算是一件非常具有革命性的創舉。http://www.midday.co.nz/article.php/4210/3)

 

算啦! 裝修得唔好啫, 啲食物好味就得喇啩。 客觀嚟講, 食物嘅味道係可以接受嘅, 不過呢.., 選擇就真係不多喇! 比較起之前嗰兩艘船, 呢度嘅食物款式真係最少, 而且呢, 更令人困擾嘅問題, 就係攞食物嘅方式： 

 

呢間餐廳為咗要扮「服務周到」, 係無放置食物鉗俾客人自取食物嘅; 食物檔嘅食物, 全部都係要由佢地嘅員工, 幫客人放進食物盆上。 客人一多, 大家就要等到黐肺, 每食完一盆, 再要出去加添, 咪再要黐肺多一次囉, 問你服味?

 

其實員工嘅人數同埋速度都無問題, 但係呢, 嗰位設計食物檔嘅「奇才」就真係好有問題囉..,

 

每一排食物枱上面呎半左右, 唔知點解? 都會有一塊斜放嘅玻璃檔住食物噃, 船客要取食物, 便要把食物盆伸入去塊玻璃下面, 先至可以俾服務員放到食物, 試問當有幾百人喺度排隊, 輪到自己有機會攞食物時, 每攞一種食物, 就要將個食物盆伸出伸入, 要多攞幾種食物, 一定會伸到手痺, 就算係餓足幾日先上船, 都會被啲咁嘅操作, 煩到無晒食慾噃!? Solstice 呢一招「源頭減人」, 真係好成功, 慳番好多食物之餘, 仲夠晒節能減廢, 好環保!!?  

估唔到同一條船, 船房設計得咁好, 但間咁主要嘅餐廳就設計得咁差!? Ocean 嘅 View 「無得 View」、 自助嘅餐「要 求助」, 食嘢食得咁濕滯, 好唔過癮啫! 雖然只係啱啱上船, 不過呢, 差唔多都可以肯定, 以後唔會再幫襯呢隻船囉!     

 

眼前嘅奧克蘭

 

在 14樓嘅餐廳外面, 就係露天甲板層, 呢度有緩跑徑、 酒廊和其他戶外活動設施。 從甲板層望去「奧克蘭」市, 城市面貌盡收眼底。
   

聽人講「奧克蘭」市最熱鬧嘅區域, 就係喺郵輪碼頭附近噃, 難怪碼頭附近嘅街道、 商舖都幾旺、 遊人同車輛好多,



舉頭由船頭左前方掃向右方, 睇到好多高矮不一嘅商業大廈, 最搶眼嘅, 當然就梗係香港人熟識嘅匯豐銀行啦。


 

 

再望向遠少少嘅正前方, 就係全城最高嗰個電視塔囉。 聽講話呢個電視塔係南半球最高嘅建築物, 望到上去最高嗰層, 真係有啲腳軟, 但係就好似話有好多人, 鍾意走上去玩 bungee jump 咁話噃? Bungee jump 呢家嘢, 當然係由鬼佬創作架啦, 佢地嗰啲愛冒險、 愛運動嘅精神, 真係好利害, 有時亦好難明? 推人落樓仲竟然可以有錢收? 除咗話佢係一個挑戰自我嘅遊戲之外, 又係咪一種自虐玩意嘅商業交易呢? 咁樣發展落去, 第時會唔會再玩大啲, 連收費嘅俄羅斯輪盤都玩埋噃..? 

唔知係邊個「大師」咁聰明, 諗到將 Bungee jump 嘅中文叫做「笨豬跳」? 咁paradoxical 嘅翻譯, 真係一語中的, 正到無可再正!    

計劃今次行程時, 有諗過早一兩日到奧克蘭行吓, 然後先至登船。 但係問過幾個朋友, 佢地都話話呢度無乜好睇喎! 咁就不如慳番, 而家喺 Solstice 14樓, 本身就係一個好正嘅觀景台, 呢度望出去嘅城市景色, 可能比走落去行街睇得仲多、 仲清楚, 雖然呢個係慳水慳力嘅「到此一遊」速成版, 但勝在夠晒逍遙自在嘛。      

 

晚餐出奇咁好!

 

晚餐嘅主餐廳係喺3-4樓嘅 Grand Epernay Restaurant, 餐廳嘅裝修唔錯, 但係經過下午喺 Ocean View Café 嘅教訓, 邊度夠胆對佢有期望呢? 不過, 入到去坐低之後, 感覺上係好過 Ocean View Café 好多, 起碼內部啲裝修見得吓人囉。 全間餐廳以白色做主調, 通常白色係大路嘢, 容易使人產生好感, 不過啲燈飾就較為古老! 無相干嘅, 起碼呢度唔使排隊, 即係唔使黐肺嘛! 只要啲食物質素 OK, 咁樣嚟緊嘅 11晚都可以平安著陸, 唔使食得咁不滿。 

點咗嘅頭盆, 主湯, 主菜, 甜品, 全部都試過晒喇, 評價係點..? 真係出奇咁好!? 比起之前嘅經驗, 呢間餐廳嘅食物水平係最高嘅一間。 而且, 亦係第一次喺郵輪餐廳內, 被安排到二人枱, 全程好有私人空間, 毋需應酬其他船友, 再加上兩位服務員嘅態度熱誠有禮, 所以感覺非常之滿足, 先前對呢隻船咁多不滿, 會唔會意氣咗少少呢? 對唔住囉!!       

 

 

Night Show 草草了事 

第一晚嘅 Night Show, 無乜驚喜, 主要有駐船嘅 Solstice Singers and Dancers 出嚟唱咗幾咀、 同埋跳咗幾嘢, 不過娛樂性不大; 因為無論係佢地嘅台上衣飾、 唱嘅歌、 同埋跳嘅舞都係好「家燕姐」, 唔知係咪因為隻船有好多老人家船友呢?

 

不過, 另一位駐船嘅獨立歌手就好好多, 有形又大隻, 嗰手南美風格嘅結他, 好有味道, 唱功亦都可以。 可惜嘅就係, 成晚嘅 show 都唔夠 40分鐘, 全程草草了事, 睇嚟嗰位 Cruise Director, Ian 真係要諗計改良吓囉。

 

 

期待紐西蘭嘅湖光山色!  

今次慕名參加呢艘 Solstice 嘅紐澳遊, 第一日嘅感覺真係好普通, 無乜驚喜, 可能係睇得太多網上嘅讚譽, 所以要求高咗啲啩!? 不過唔緊要噃, 最重要就係, 郵輪之旅除咗可以享用船上設施之外, 仲可以去到唔同地區, 玩唔同嘅景點; 喺每晚瞓覺嘅時候, 隻船都會不停航行, 所以明天一早, 就會到達第一個口岸 Bay of Islands, 可以開始欣賞到「紐西蘭」嘅湖光山色喇, 好期待!  

極致號Solstice 2013年12月9日 第一天

http://skybeak.blogspot.hk/2014_01_06_archive.html

極致號Solstice 2013年12月 前奏
http://skybeak.blogspot.hk/search?updated-min=2013-01-01T00:00:00%2B08:00&updated-max=2014-01-01T00:00:00%2B08:00&max-results=26

各位大哥大姐, 睇完請 click 下面嘅 "沒有留言" , 俾啲意見好喎, 匿名都無問題架!